Jasangarritasunaren aldeko eta ingurumena zaintzeko dugun konpromisoarekin jarraituz, Euskadiko Borondarezko Karbono Funtsean parte hartu dugu. Gipuzkoako Foru Aldundiko Ingurumen Sailak bultzatu du proiektu hori, Naturklima Gipuzkoako Klima Aldaketaren Fundazioarekin lankidetzan. Funtsaren helburua da enpresaren arloan karbono-aztarna konpentsatzea eta, otsailaren 9an, parte hartu duten Gipuzkoako hamar enpresak aitortzeko ekitaldia egin zen.
Gure kasuan, CO2 emisioen % 5ari dagokion karbono-aztarnaren konpentsazioa gauzatu dugu. Lehenengo funts hori Irungo Bidasoa auzoko Etxolazarretako lursaila ekologiari dagokionez leheneratzera bideratu da, iaz izandako baso-sutearen ondorioz; Aiako Harriak Parke Naturalean dago lursail hori. Lursaileko landarediaren eta lurzoruen gaitasuna hobetzeko jarduketa egin da han, karbono-hustuleku modura jardun dezaten, haien funtzionaltasun ekologikoa indartu dadin eta inguruneko biodibertsitatea kontserba dadin.
Jesus Velasco Uvesco Taldeko Gizarte Erantzukizunaren arloko zuzendariak zera adierazi du: “bi arrazoigatik pozten gara funts honi gure ekarpena egin izanaz; alde batetik, ekintza honekin deskarbonizazioarekin dugun konpromisoan beste urrats bat egin dugulako eta, bestetik, lehenengo proiektu hau tokikoa delako, etekina Gipuzkoara itzuliko baita zuzenean, Irunera, hain zuzen ere, gure bi planta logistikoetako bat dugun hirira eta, beraz, gure jarduerarekin inpaktu gehien sortzen dugun ingurunera”. Honako hau Uvescoren jasangarritasun-estrategiaren beste ekimen batzuei batzen zaie. Hala nola Lean&Green hiru izarrak lortu ditu Taldeak eta, mugikortasun jasangarriko formula berrietan aurrerapenak egiteko, furgoneta elektrikoak erabiltzeko eta kamioi elektrikoekin probak egiteko ekimenak jarri ditu abian.
