Uvesco Taldeak bat egin du Basque Ecodesign Center aliantzarekin; Eusko Jaurlaritzak bultzatutako aliantza publiko-pribatua da, eta helburua da euskal enpresa-sarean ekonomia zirkularraren arloan aurrera egitea. Martxoaren 11n eman zuen erabakiaren berri taldeak, Barakaldoko (Bizkaia) BICen egindako ekitaldi batean; han izan zen, besteak beste, Arantxa Tapia, Eusko Jaurlaritzako Ekonomia Garapen, Jasangarritasun eta Ingurumen sailburua.
Ekodiseinuaren eta ekonomia zirkularraren arloan, Europa Hegoaldeko erreferentzia-guneetako bat bezala aurkezten da Basque Ecodesign Center. Haren eginkizuna da ekonomia zirkularraren inguruko jakintza sortzea, lehentasunezko arloetan euskal industria-sarera ekar daitekeen berrikuntza bultzatuta; eta balio-katea ekonomia zirkularreko eredu baterantz bultzatzea.
Hasiera batean, lau urtez egongo da Uvesco Taldea aliantza horretan. Esparru horren barruan, ontzien jasangarritasuna hobetzeko lan egingo da, ekodiseinuko neurriak hartuta, eta ingurumen-neurketa ezberdinen analisian aurrera egingo da, aztarna hidrikoarenean esaterako. Horrela, karbono-aztarnaren ziurtagiriarekin hasitako neurketa- eta hobekuntza-prozesuarekin jarraituko da. Lean&Green hiru izarrak lortu zituen taldeak ekimen harekin.
Uvesco Taldea, beraz, Euskadin erreferente diren eta Ihobe eta SPRI erakunde publikoak koordinatzen dituzten 16 enpresa handik osatzen duten aliantza horretan sartu da, eta jasangarritasunarekin eta ingurumena babestearekin duen konpromisoa sendotzen du.